Песнь 6 — О усопших многих

Ирмос: Обыде нас последняя бездна, несть избавляяй, вменихомся яко овцы заколения, спаси люди Твоя, Боже наш: Ты бо крепость немощствующих и исправление.

Припев: Дивен Бог во святых Своих, Бог Израилев.

Яко милосерд, преставленным даруй прегрешений прощение, и вечное наслаждение подая, идеже сияет лица Твоего светлость, и озаряет страстотерпцы Твоя.

Припев: Упокой, Господи, души усопших раб Твоих.

Иже кровию от ребр Твоих истекшею мир искупил еси, верою усопшия убо, Христе, избави честными Страстьми Твоими, Ты бо цену за всех Себе дал еси.

Припев: Упокой, Господи, души усопших раб Твоих.

Иже создавши мя рукама пречистыма первее, и дух даровавши, и к земли низпадша зле, паки обновивши краснейше, ныне души преставльшихся Сам упокой.

Слава: Чертогу Твоему светоносному, Господи, вселити сподоби, яже в вере к Тебе усопшия, тех презирая прегрешения, яко благ и милосерд и многомилостив.

И ныне: Поем Тя, Благословенная Чистая, Еяже ради нам возсия, сущим во тьме и сени смертней, правды незаходимое Солнце, Ты бо нашего спасения ходатаица была еси.

Господи, помилуй. (Трижды)

Слава Отцу и Сыну и Святому Духу, и ныне, и присно, и во веки веков. Аминь.