Песнь 1 — О усопших многих

Ирмос: Твоя победительная десница боголепно в крепости прославися: та бо, Безсмертне, яко всемогущая противныя сотре, израильтяном путь глубины новосоделавшая.

Припев: Дивен Бог во святых Своих, Бог Израилев.

Врата смерти и вереи, Твоею смертию сокрушил еси Безсмертне, врата отверзи, Владыко, паче ума безсмертия усопшим, молитвами страстотерпец Твоих.

Припев: Упокой, Господи, души усопших раб Твоих.

Да Божественнаго живота сподобимся, сошел еси к смерти, той же испроверг сокровища, нас оттуду извлекл еси; ныне же, Жизнодавче, преставленныя упокой.

Слава: Ты мое тленное же и мертвенное восприим, в нетление облекл еси, и к безконечному житию и блаженному вознесл еси, идеже яко щедр, ихже приял еси, упокой.

И ныне: Рождшую еже от Бога Божие Слово, вернии воспоим: Та бо Всечистая путь жизни умершим бысть, Юже яко Богоприемницу и Богородицу, прославим.